رفعت خوري
آخر صبحية بالبيت
يوم ال ودَّعت وفلّيت
بكّير صحيت بهالبيت
مهموم وفايت بالحيط
حلّ رجوعي وماتهّنيت
شهرين مروا وماحسييت
*******
فتحت الشباك وطلّيت
لقيت الشفق ملوَّن هيك
محروق ع فراقي ظنيت
دمعت عيني وبعدا بكيت
حملك ياضيعة تمنّيت
بعدي بحضنك بس حنّيت
******
ترك الضيعة ماحبيت
تأجيل السفرة اشتهيت
وأبحث عن حل ابتديت
وبعون الباري استجديت
وبقدرة ربي استقويت
أيدي على خدي حطّيت
فرفكت براسي وحكّيت
اجمعت اضربت وماخلّيت
شرشر عرقي وانبّلّيت
انهارت أعصابي وعانيت
********
ولما أخفقت ونخّيت
ولما الحلة مالاقيت
لملمت غراضي وضبّيت
بالشنتة فتحت وحطّيت
وبقلب تيابي خبّيت
صورة بيّ وأم وخيت
صورة رفقاتي ل حبّيت
ذكرى بالضيعة قضّيت
نرجس , زنبق وفيوليت
زعتر من مونات البيت
شنكليش عالتنّور لفيت
قطنة مبلولة بالزيت
من مار جرجس قبلا جيْت
شوية تربة وحجر اخفيت
وكلشي بأرض الضيعة لقيت
*********
ولما من الضَّب انتهيت
رجعت لشباكي وطلّيت
ودّْع هالضيعة مانسيت
جلت بنظري بيت وبيت
صرخت وخبَّطت وناديت
صدى صوتي وحدو لقيت
ولما سايح ماردّيت
مسحت دموعي وبعدا بكيت
سكّرت شبابيك البيت
ولوحت بإيدي وفلّيت
*******
عالباب قعدت استرخيت
تذكرت الضيعة وبكيت
حملت الشنتاي , تواريت
بعدي مجروح ومانسيت
رفعت خوري
إسبانيا
