غازلتها وگالت الجتفك الوگ
ويابخت جتفي الصبح تجايه
گالت بحلگي سوالف بيها غيض
مايطيب الخاطر إمن إحجايه
ارمله و من بعده غطاني التراب
بأليقين ومو قصص وأروايه
انه ام وجان كافلني النشيط
استشهد وضلن بناتي اهوايه
جان من يمشي الحرب خصري باديه
وانه حامل حملي كله انثايه
الانولدن مشن بيهن رفعنه الراس
والضلن بعدهن بيهن اكفايه
دلاهن درب حگ وقسط ميزان
مايخطي هدف افضل الرمايه
شجاعه ومرجله يتغازل اويه الموت
لوصال عله نده يحرر اولايه
ماطول عليك وانته كلك طيب
خنكمل مسير البادي ويايه
اعيونك حجلي اتريدني اوفي وياك
والزلمه الخشن معروف من مايه
انه السمره الاصيله المااطخ لاعداي
من گرصة ازناد نحقق الغايه
وجهني عله رايك وانته كلك راي
يبو زنود السمر يالثابت برايه
رياض كامل سواري
العراق
..................
.......................................
.......................................
.......................................